من خطاب الرئيس جمال عبد الناصر عن الاشتراكية اول مايو1966

. . . . .
" الاشتراكية ان احنا نقضى على الفقر، ناخد من أهل الغنى ونعطى لأهل الفقر، دا بالنسبة لهم كفر! كفر ليه؟! لأن هم أهل الغنى، اللى بيطلع.. اللى بيقول هذا الكلام، يقول لك الاشتراكية ضد الدين، هو أهل الغنى هو اللى سافف الفلوس وهو اللى واخد الفلوس، هو اللى بياخد ثروة البلد كلها لنفسه، وطبعاً عايز أطبق الاشتراكية حيجيب فلوس ويوزعها على الناس، طب وهو عبيط حيجيب فلوس ويوزعها على الناس، دا هو بيعتقد إن هو من عيلة مميزة، عيلة الأسياد وبقية الناس عبيد.

هل دا هو الإسلام؟! هل الإسلام قال إن تكون فيه عيلة تسود والشعب كله عبيد؟
!
هل الإسلام يقول إن تطلع عيلة فى بلد وتحكم حكم إقطاعى وتسف كل الفلوس؟
!
الفلوس اللى طالعة كلها بتروح للعيلة والباقى قاعدين مش لاقيين ياكلوا، هل الإسلام بيقول إن الشعب يكون كله من العبيد، وتكون هناك عيلة مميزة هى اللى تاخد الدخل كله؟
!
هل الإسلام يقول ان احنا ناخد فلوس المسلمين؟! ننهب فلوس المسلمين؟! ونسف فلوس المسلمين ونسرق فلوس المسلمين؟
!

الحقيقة أبو دقن دا (تصفيق)أما يطلع يتكلم هذا الكلام هو عايز يستغفل الناس، وعايز يضحك على الناس، عايز الناس يقولوا له آه أنت أمير المؤمنين، دقنك طويلة وسافف فلوسنا ونسلم لك بإنك تربى دقنك وتسف فلوسنا؛ لأن الإسلام بيقول كده!
ولكن أنا باقول إن الناس مش حيقولوا كده، وزى ما ينتفوا دقون الرجعيين كلهم حينتفوا دقنه؛ لأن دا سنة الكون

مش أنا اللى عملت الكلام دا، دا سنة الكون ودى الطبيعة، ممكن نستغفل الناس ١٠ سنين و٢٠ سنة، ولكن حنستغفل الناس على طول! بنطلع نقول لهم دى الاشتراكية ضد الدين
!
هم الناس مغفلين ؟
!
بنطلع نقول لهم الاشتراكية ضد الدين، والناس طبعاً النهارده كل واحد عنده راديو ترانزستور وبيسمع وبيقول والله الاشتراكية تكافؤ الفرص، الاشتراكية مساواة مافيش أمير، ولافيش غفير

ولافيش صاحب السمو، ولا صاحب الجلالة، ولافيش واحد بدقن، وواحد مالوش.. وماهياش أبداً مختلفة، العملية كلها مساواة

الاشتراكية ازاى تبقى ضد الدين إلا إذا كنتم يا أصحاب الذقون قايمين تتاجروا بالدين؟
هل الشعب مغفل علشان يقبل وتنطلى عليه التجارة بالدين؟
!
التجارة بالدين انطلت فى وقت من الأوقات ولكن لا يمكن، الدنيا النهارده اتغيرت والدين النهارده... مفهوم الدين هو المساواة، الدين هو العدالة، الدين هو أن نعطى أموال المسلمين للمسلمين، الدين مش أبداً ناخد أموال المسلمين لواحد وعيلة، وعدد من المنتفعين المستغلين، الدين هو العدالة الاجتماعية

اللى عايز يطبق الإسلام.. يوزع أموال المسلمين على المسلمين.. يوزع أموال المسلمين على المسلمين، ويقول أهو دا الدين.. باقول له أنت دلوقت بقيت اشتراكى لأنك بتقيم عدالة اجتماعية، وتقيم المساواة بين الناس
اللى عايز يطبق الدين مايقسمش الشعب إلى عيلة وشعب، عيلة من الأسياد وشعب من العبيد، دا.. دا الكفر.. دا كفر الرجعية؛ الرجعية اللى بتحاول إنها تستغل الدين علشان تستغل أموال الناس وتأكل أموال الناس بالسحت
ولكن الناس النهارده اتنورت، وإن صبروا سنة مش حيصبروا سنتين، وإن صبروا خمسة مش حيصبروا عشرة، لازم كل واحد حياخد حقه

وكل واحد يعلم علم اليقين أن الدين هو دين الحرية، ودين المساواة، ودين العدالة الاجتماعية، ودين الأخذ من الأغنياء للفقراء، ودين أموال المسلمين للمسلمين

وليس الدين أن تحتكر فئة قليلة أو عيلة واحدة كل شىء وتاخذ كل الخيرات وتسيب الشعب جعان، ما فيش فرص، ما فيش أى شىء

الدين ان احنا نعمل من أجل حرية بلادنا ومن أجل تعزيز ديننا ولا نعمل من أجل الاستعمار

نحن نسير فى بناء مجتمع تكافؤ الفرص.. مجتمع العدالة الاجتماعية
نحن بهذا - أيها الإخوة - نطبق ما نادى به الله سبحانه وتعالى، وما نادى به رسوله

وطبعاً لن تنطلى أساليب الدقون علينا، احنا شعب متحضر، وشعب متنور، وشعب حدق وبيفهم (تصفيق)، ولن تستطيع أساليب الرجعية إنها تنطلى علينا، استردينا حقنا
كان عندنا فى زمان يعنى بيقعد الواحد لأولاده، ويقول لهم والله فى زمان كان عندنا ناس بدقون عاملين البلد إقطاعية، ولكن طلع الشعب يوم ٢٣ يوليو سنة ٥٢ ونتف دقونهم

وبعد كده استرد كل شىء، استردينا الأرض واستردينا وسائل الإنتاج، واستردينا أموالنا، واستردينا فلوسنا، واستردينا بلدنا، وطردنا المحتلين، وطردنا المستغلين وطردنا المحتكرين، وأممنا وسائل الإنتاج، وسيطر الشعب على وسائل الإنتاج، وكتل الشعب جهوده الخارقة حتى يبنى مجتمع العدالة ومجتمع الكفاية ومجتمع الرفاهية وبدأنا نقدم المال، ونقدم العمل، وعملنا الخطة الخمسية الأولى، واستثمرنا ١٥٠٠ مليون جنيه، وبنينا أكتر من ١٠٠٠ مصنع، ملك مين الـ ١٠٠٠ مصنع دول؟
مافيش حد بدقن بيملك ولا مصنع فى هذه المصانع، كل المصانع ملك للشعب، ملك لك وملك لولادك وملك لأخواتك وملك لأهلك وملك لعيلتك الصغيرة، وملك لعيلتك الكبيرة
وطلعنا من الخطة الخمسية إنتاج، وحققنا نسبة مئوية كبيرة من الإنتاج، رايح لمين الإنتاج دا؟
لا حيدخل فى جيب فلان ولا حيدخل فى جيب علان

عندنا رئيس الجمهورية ما حيلتوش حاجة، ومالوش عيلة، مالوش دعوة، ومافيش عيلة حتحكمنا ، عندنا ابن رئيس الجمهورية زى ابن أى واحد، عندنا مجتمع مافيهش طبقات، بنذوب فيه الفوارق بين الطبقات، رئيس الجمهورية مين؟ رئيس الجمهورية أبوه واحد موظف أصله من عامة الشعب، كان بياخد ٢٥جنيه

وبكره حييجى لكم مين رئيس جمهورية؟
واحد منكم ماحدش يعرف "