قصيدة ( البدل) لعبد الرحمن الابنودي

ابادلكم حرية ... بسجن
ابادلكم سلم...بحرب
ابادلكم صوتي... بصمت
ابادلكم اسمي...بصوت مجهول
ابادلكم فدادين الطين
بالعتمة في رطوبة الزنازين
ابادلكم حاكم عادل بالفرعون الجبار
الجنة...بالنار
الراحة... بتعب القلب
ابادلكم امن ...بخوف
زهرية ورد...بكباية دم
و حيا مرتاحة...ابادلها بموت
ابادلكم ضحكاتي...بغم
و رفيقي ابادله بمخبر كلب
ابادلكم لو كنتم تبادلوني
تاخدوا سنواتكم و تردولي السنوات
صعب تردولي السنوات!
صعب تبادلوني برجوع العزة
و معني الوطنية و الاوطان للشعب
و رجوع دم الشهداء
و الوجه الاصلي لكلمة اعداء
و نضارة وجه الفقراء
و كرامة تساوي كرامة كل اللي اتسلبوا
و النصر..لكل اللي من غير حرب
اتغلبوا!!!
بادلوني.... وجوه بوجوه
و لغاتبلغات
خدوا كل اللي حيلتنا من الوفات
اللي اتنهبوا و اللي لسه حيتنهبوا
و ردوا للامةرجولتها و نخوتها و قدرتها
ردوها من تابع مذلول
لزعيمةالاستقلال
من قطعان سايحة....لرجال
ردولها كل اللي سرقتوه من مال
ادفعوا عنها ديون الاطفال
ردوا لها شمس المستقبل
و اكنسوا اطنان العتمة من درب الاجيال
اخلاق الشعب اللي انداس
و اللي اصبح ناس..مش ناس
ردوا للشعب رغيفه المخطوف
صوته الاصلي و عرقه المسفوف
وبالمجاني..رجعوا للطفل الكراس
ابنوا علي شط النيل المصنع جنب المصنع
ردوا للجندي المصري وظيفة المدفع
ردوا الانسان العادي ياخد قيمة ما يدفع
و الفلاح ردوه من ذل الغربة
و ردوله حبه للفاس
ردوا الوطن المسروق
اللي اتمرغ في مخالب السوق
فكوا عنه الطوق
شيلوا القدم الصهيونية الساكنة في الدقي
و ماشية في باب اللوق
ردوا الجمعية للفلاحين
والمصنع للعمال
لو تقدروا تخرجوا م الاغلال
اللي كتفكم بيها اللي علمكم لعبة رأس المال
لو غيرتوا الحال
اقسم قدام شعبي اغني لكم من قلبي
و عمري ما اغني تاني
ل..جمال!!!!!!!!!