قصيدة (ارجع بأه) لجمال بخيت

ارجع بأه
و فك حبل المشنأة
و امسح همومنا باللقا
يا جذرنا تحت التراب
يا حلمنا فوق السحاب
يا عمرنا طال العذاب
في الأنتظار
رجعوا التتار
لكننا أشواك بتتحدي العطش
و جنود بتتحدي الفرار
نسقط ساعات
لكن نفضل كبار
نفتح عيون للانبهار
متشوقة
فارجع بأه
و فك حبل المشنقه
و ارفع راياتك يا أبي
قريش بتسأل عن نبي
يهديها من بعد العمي
خالد قتل مسيلمة
لكن جنوده الكدابين
عينهم في طابا
يتحدوا فرسان الخطابة
و يلجموهم بالسكوت
في عصر بيروت الحزين
خالد قتل مسيلمة
لكن جنوده الكدابين
بيفتتوا دلتاك بصبر
و بيحفرولي في سينا قبر
و بيركبوا نيلي العنيد
و بيخنقوني في الصعيد
بكلام نكت و بتريقه
فارجع بأه
دا الهزل زاد
و الباشا ايده علي الزناد
و صدقي بيصلي لفؤاد
و بيحلفوا نرجع عبيد
نتباع في أسواق الكساد
الهزل زاد
و الباشا ايده علي الزناد
و السد جوه الفوهة
لو ينسفه تغرق بلادك كلها
و تعود سنين الأوبئة
تسكن قلوبنا الضيقة
فأرجع بأه
الشمس سكنت كل غروب
حلفت ما ترجع للشروق
من أي شرق
ان لم تكن في الانتظار
انت وسيفك - والتتار تحت القدم -
فأقضي بصوتك علي العدم
اعدل موازين الزمان
رتب نجومنا في الفضا
و اكسي وجوهنا بالرضا
بعد الشقي
دي الأمة لسة محتاجاك
و الارض لسه مهيأه
فأرجع بأه!!